طريقة اخذ صورة من شاشة الكمبيوتر و حفظها خطوة بخطوة بالصور

نشرح طريقة اخذ صورة من شاشة الكمبيوتر و حفظها خطوة بخطوة بالصور بعد ان سبق و شرحنا ذلك بالفيديو ( من هنا )
دلوئت احنا عايزين ناخد صورة من شاشة الكمبيوتر ، الشاشة ممكن يكون عليها الديسكتوب ( سطح المكتب ) او محتويات أى فولدر فتوح أو برنامج انا شغال عليه و عايز أصور صفحته اللى انا شغال فيها أو أى صفحة انترنت سواء كانت منتدى أو موقع اخبارى او متصفح جوجل أو أى صفحة على الانترنت ، أيا كان اللى موجود أدامنا على الشاشة احنا عايزين نصوره ( ماعدا الافلام ) و ناخد الصورة و نستعملها .. نضغط على الكيبورد ( لوحة المفاتيح ) على الزرار اللى مكتوب عليه Print Screen و شكله ح يكون زى الصورة دى :



بص براحة على الكيبورد و دور على المفتاح لغاية ما تلائيه ، لما نضغط على الزرار بتاع print screen ذاكرة الكمبيوتر اخدت تعليمات انها تحتفظ بصورة من اللى موجود على شاشة الكمبيوتر وقت الضغط على الزرار ، يعنى ذاكرة الكمبيوتر اصبح عندها بعد الضغط على الزرار ( نسخ - copy ) منتظر يتعمل له ( لصق - paste ) فى اى لحظة ، تمام ؟!
بعد كده ح نستعمل برنامج الرسام paint لاستدعاء الصورة من ذاكرة الكمبيوتر ، لغاية ما تفتح برنامج الرسام ممنوع تعمل ( نسخ - copy ) و إلا ح تخسر الصورة اللى فى ذاكرة الكمبيوتر و تضطر تعمل برنت سكرين print screen مرة تانية .
دلوئت احنا شغالين على ويندوز 7 بالتالى ح ندوس على قائمة start ( ابدأ ) و نخش على قائمة البرامج و نضغط على البرامج المساعدة accessories


و منها نختار برنامج الرسام paint و نفتحه ،



ح تفتح معانا صفحة البرنامج ، نضغط بالماوس على ( لصق paste ) ..



ح نلائى الصورة اتحطت فى صفحة البرنامج و ح نلائى ان حجمها كبير ، انا عملت برينت سكرين لصفحة ادوب فوتشوب و انا شغال عليها بعمل الشرح ده و بعد كده فتحت برنامج الرسام و دوست على ( لصق paste ) ..



دلوئت عايزين نصغر الصورة شوية عشان نعرف نتعامل معاها لأنها كبيرة جدا ، من شريط برنامج الرسام اللى فوووق اضغط على resize



ح تطلع لنا قايمة ...
القايمة فيها مقاسات طول الصورة و عرضها و كل مقاس مكتوب جنبه رقم 100 ، عدل رقم 100 خلليه مثلا 70 و لما تعدل رقم ح تلائى الرقم التانى اتعدل لوحده ، يعنى لما تخللى الطول 70 ح تلائى العرض اتعمل 70 لوحده ..



و ح تلائى مقاسات الصورة صغرت و تقدر تحرك المسطرة اللى على يمينك بسهولة



لو الصورة عاجباك كده تقدر تحفظ العمل بالطريقة اللى ح اقولهالك كمان شوية ، و لو شايف انك محتاج تقص منها حاجة خلليك معايا حبة صغيرين ..
دلوئت احنا عايزين نقص الحتة اللى تحت خالص من الصورة ..
ارجع تانى لشريط ادوات برنامج الرسام اللى موجود اعلى صفحة البرنامج و اضغط على crop



لما نضغط على crop ح نلائى مربعات بيضا صغيرة بئت حوالين حواف الصورة ، لو وقفت بالماوس على اى مربع منهم ح تلائى شكل الماوس اتحول لسهم له راسين



نقف بالماوس على المربع الصغير اللى موجود فى النص من تحت لغاية ما شكل الماوس يتحول لسهم له راسين و نسحب لفوق ح نلائى الجزء المطلوب قصه من الصورة بيختفى معانا ، نفضل نطلع لفوق بالماوس لغاية ما نقرر ان كده تمام و الصورة بئت 100 100
دى صورة قبل القص



و دى صورة بعد القص



دلوئت جه الدور على حفظ العمل بحيث ناخد الصورة بعد كده من على جهازنا و نشوف عايزين نعمل بيها ايه ..
اضغط على الزرار المشار اليه بالسهم فى الصورة



ح تظهر لك قائمة اختار منها save as ( حفظ بإسم ) ح تطلع منه اختيار اضغط بالماوس على الاختيار التانى من فوق



اضغط على ديسكتوب لحفظ العمل على سطح المكتب و اكتب اسم للصورة او سيب الاسم اللى البرنامج كاتبه زى ماهو و بعد كده اضغط save حفظ ،



و بكده تكون اخذت صورة لحاجة كانت موجودة ادامك على شاشة الكمبيوتر ( ماعدا الافلام ) و عرفت تتحكم فى مساحتها و ايه اللى عايزة يظهر منها و حفظتها ..
ممكن بعد الحفظ ترفعها على اى موقع رفع و تاخد الرابط بتاعها و تشوف عايز تعمل بيه ايه ،
ندعو الله ان نكون قد وفقنا فى الشرح و الايضاح و الى لقاء اخر و شرح جديد مع فريق عمل منتديات نسائم الشرق ، مع ارق تحياتنا ...

الموضوع الأصلي: طريقة اخذ صورة من شاشة الكمبيوتر و حفظها خطوة بخطوة بالصور || الكاتب: ابن مصر || المصدر: منتديات نسائم الشرق